युएई एयरपोर्ट नजिकै ड्रोन आक्रमण, दुई भारतीय सहित ३ को मृत्यु

युएई । युएईको अबुधाबीस्थित प्रमुख तेल भण्डारण सुविधा नजिकैको पेट्रोल ट्याङ्कीमा भएको संदिग्ध ड्रोन आक्रमणमा तीन जनाको मृत्यु भएको छ । 

राज्य समाचार एजेन्सीका अनुसार विष्फोटमा एक पाकिस्तानी नागरिक र दुई भारतीय नागरिकको मृत्यु भएको छ भने अन्य छ जना सामान्य घाइते भएका छन् ।

राजधानी अबुधाबीको प्रहरीले समेत सोमबार बिहान ३ वटा तेल ट्याङ्करमा विस्फोट भएको र निर्माणाधीन नयाँ विमानस्थलमा आगो लागेको प्रहरीको भनाइ छ । प्रहरीले जारी गरेको विज्ञप्ति अनुसार संभावित ड्रोन हमलाका कारण तेल ट्याङ्करमा विस्फोट र विमानस्थलमा आगो लागेको छ । हाल ट्याङ्कर र विमानस्थलमा लागेको आगो नियन्त्रणमा आएको प्रहरीले जनाएको छ । ड्रोन हमलामा खासै ठूलो क्षति नभएको पनि समाचारमा उल्लेख छ ।

उक्त आक्रमण इरान समर्थित यमनको सशस्त्र संगठन हुथीले गरेको अल अरेबियाले जनाएको छ । 

यमनमा जारी युद्धमा साउदी अरबले नेतृत्व गरेको हुथीविरुद्धको गठबन्धन सेनामा यूएईको समेत सहभागिता रहेको छ । केही समयअघि हुथीले लाल सागरमा यूएईको पानीजहाज कब्जामा लिएपछि दुबै पक्षबीच आरोप–प्रत्यारोप जारी छ ।