संसारभरिका मानिसलाई ‘सडकमा उत्रिएर युक्रेनप्रति समर्थन जनाउन’ जेलेन्स्कीको अपिल

काठमाडौं। रुसले आफ्नो देशमाथि आक्रमण गरेको एक महिना पुगेको दिन बिहीबार युक्रेनका राष्ट्रपति भोलोदिमिर जेलेन्स्कीले संसारभरिका मानिसहरूलाई ‘सडकमा उत्रिएर युक्रेनप्रति समर्थन जनाउन’ अपिल गरेका छन् ।

निरन्तरको रुसी बमबारी झेलिरहेको राष्ट्रपति जेलेन्स्कीले बिहीबार आफ्नो सम्बोधनमा भनेका छन्, ‘तपाइँहरू आफ्ना सहरका चोक तथा सडकमा आउनुस् । देखिनुस् र सुनिनुस् । मानिसको जीवनको महत्व छ, स्वतन्त्रताको महत्व छ, शान्तिको महत्व छ अनि युक्रेनको महत्व छ भनेर बोल्नुस् ।’

उनले सम्बोधनका क्रममा केही बेर अंग्रेजीमा बोल्दै संसारका मानिसलाई युक्रेनी प्रतीक लिएर आउन आग्रह गरेका हुन् । रुसले स्वतन्त्रताविरुद्ध युद्ध छेडेको उनले भनाइ छ ।

रुसको निर्मम र मुढे बललाई संसारले रोक्नुपर्ने उनले बताए । रुसले आक्रमण गरेको एक महिना बितिसकेको र यसबीच आफ्नो, सबै युक्रेनी जनताको अनि यस धरतीका सबै स्वतन्त्र मानिसको मुटु चुँडिएको उनले उल्लेख गरे ।

ब्रसल्समा नेटो बैठक हुन लागेको बेला उनको यस्तो सम्बोधन आएको बीबीसीले जनाएको छ । बुधबार युक्रेनको राजधानी किभका भूभागमा निरन्तर रुसी बमबारी भएको बीबीसीलगायत विभिन्न अन्तर्राष्टिय सञ्चारमाध्यमले उल्लेख गरेका छन् ।

पश्चिमा विश्लेषकहरूले युक्रेनले प्रत्याक्रमण गरिरहेको र केही साना सहर पुनः आफ्नो कब्जामा लिएको बताएका छन् । भूउपग्रहले खिचेका तस्बिरमा मारिओपोल सहरमा व्यापक क्षति पुगेको र आवासीय भवनहरूबाट धुवाँको मुस्लो निस्किरहेको देखिएको समाचारहरुमा जनाइएको छ ।

उत्तरतर्फ रुसले डेस्ना नदीमाथिको एक महत्वपूर्ण पुल ध्वस्त पार्दै चेर्निहिव सहर र राजधानीबीचको मुख्य सम्पर्क मार्ग विच्छेद गरिदिएको बीबीसीले जनाएको छ ।