यू- १९ महिला क्रीकेट टोलीले चीनमा सम्पन्न बेल्ट एण्ड रोड सिरिजको उपाधी जितेको छ ।
हङकङसँगको आइतबारको अन्तिम खेल वर्षाका कारण पूरा हुन नसकेपछि नेपालले अपराजित रहँदै प्रतियोगिताको उपाधी उचालेको हो ।
४ टोलिको सहभागिता रहेको प्रतियोगितामा नेपालले खेलेका ६ खेल मध्ये ४ खेलमा जित हासिल गरेको थियो भने बाँकी दुई खेल वर्षाका कारण रद्द भएका थिए ।
नेपालले सिरिजको पहिलो खेलमै थाइल्यान्डलाई ७ विकेटले पराजित गर्दै विजयी सुरुवात गरेको थियो । त्यसपछी चिनसँगको दोस्रो खेल वर्षाका कारण प्रभावित भएपछि तेस्रो खेलमा हङकङसँग ९२ रनको जित तथा चौथो खेलमा पुनः थाइल्यान्डमाथि ५२ रनको जित निकालेको थियो ।
पाँचौ खेलमा आयोजक चिनलाई ८४ रनले पराजित गर्दै उपाधियात्रा थप बलियो बनाएको नेपालले अन्तिम खेलमा हङकङसँग प्रतिस्पर्धा गरेको थियो ।
अन्तिम खेलमा पहिला ब्याटिङ गरेको नेपालले वर्षा हुनु अघि ११ ओभरमा २ विकेटको क्षतिमा ८८ रन बनाएको थियो । त्यसपछि मौसम प्रतिकूल बनेपछि खेल हुन सकेन ।
प्रतियोगितामा नेपाल, आयोजक चिन, हङकङ र थाइल्याणड गरि ४ टोली सहभागी थिए ।
